- 442 -

1409. Dez. 26. Liegnitz.

Abt und Convent des Klosters Leubus bekennen, dass ihr Untersasse der liegnitzer Bürger Hannos Hezeler das Vorwerk in dem Dornpusch an Frau Agnes Kernyn und ihre Söhne Matthias und Stanislaus verkauft hat.

In gotis namen amen. Sint dem mole dy handelungen der toththen ufte gegebin werdin eynir vorgessinheyt, zo ist is wol bilch vnd notdorft, daz zie durch sicherunge wylle mit kreftigin bestetigungen der briefe geentwort werden den nochkomenden. Hirumb wir brudir Paulus apt,. Dominicus preyel, Johannes vom Sagan vndirpreyel, Johannes Wilhelmi kelner, Johannes Korschner, pfortener, Nicolaus Freyenstad, brudirmeistir, Philippus kornschreiber vnd dy gancze samlunge des clostirs Lubens bekennen uffintlichen in diesim briefe allen, dy en sehen adir horen lesen, daz vor vns komen ist Hannos Hezeler, burger czu Legnicz vnsir getruwir vnd vndirsese des forwerkis in dem Dornpussche, daz do gehort czu sante Lorenczen Capelle vf dem hawse czu Legnicz vnd gelegin ist vor der stad doselbist, vnd hot bekand mit guttem mutte vnd vmbetwungen, daz her recht vnd redlich mit wyllen vnd wyssin Agnethe siner eefrowen siner geerben vnd rechten nochkomlingen vorkowft hat daz selbe forwerg gelegen in dem Dornpussche, des do nemlichin sint vier hufen erbis adir ackirs, vnd vierhundirt marg vnd vmb sechs vnd czwenczig marg Bemisscher grosschin Polnisscher cza1, dy her auch iczunt empfangen hot gancz vnd gar vnd an sinen notcz gewand, den irbarn toguntlichin frowen Agnethe Kernyn vnd Mathie vnd Stanislao iren sohnen, iren geerbin vnd elichin nochkomlingen mit sulchem rechte vnd freyheyten, als her is vnd andir sine vorfarn von aldirs gehat han vnd besessen, vnd als daz selbe forwerg gancz vnd gar in seyn greniczen vnd reyen gelegen ist vnd von andirn guttirn vmb vnd vmb gesundirt ist, vnd hot sich des allis vorczegen vnd geuissint vnd in vnsir hende wylleclichen vfgelossin vnd hot vns gebethen demuticlichen mit fleyse, daz wir daz egenante forwerg in dem Dornpussche der obgenanten Agnethe Kernyn, Mathie vnd Stanislao iren sonen, iren geerben vnd rechtin elichin nochkomlingen geruchten czu langen, czu leyen vnd czu vorreychen, des habin wir angesehen got czu vor vnd sinen willegen dinst, den her vns vnd den vnsern geton hot vnd nochmols in czeyten thun wirt, vnd habin daz selbe forwerg in dem Dornpussche den egenanten Agnethe Kernyn, Mathie vnd Stanislao iren sohnen, iren geerbin vnd rechtin elichin nochkomlingen gancz vnd gar vnd bynamen mit den vieren hubin erbis vnd ackirs vnd mit alle dem, daz dorczu gehorit, is sey cleyn adir gros, nichtis vsgenomen, wy man iczlichis sundirlichen mit seynyn namen nennet adir mag genennen, gelangit, gelegen vnd vorreycht als obin geschrebin stahet, vnschedlichen vnsirs clostirs czinsen, rechten vnd diensten mit macht vnd craft dieses briefis erplichin czu besiczen, czu vorkowfin, czu vorseczen, czu vorwechsiln, vnd an iren, irer geerbin vnd rechtin elichin nochkomlingen notcz vnd fromen, zo zie allir beste mogen, czu wenden, nemlichin in sulchir vndirscheyt, daz wir vns vnd vnserm obgenanten clostir vf dem selben forwerke in dem Dornpussche alle jar jerlichen sechs marg jerlichis czinsis uf sante Mertins tag vfczuhebin behaldin, dy vns vnd vnserm clostir gancz vnd gar vor allen andirn czinsin vnd genissen on hindirnos vnd alle wederrede, sullen gefallen vnd gegolden werden vnd do mitte eyn schuczin dienst mit eyme pferde in dem lande vnd gebitte czu Legnicz uf sinen schaden vnd czerunge, adir vswenig des landis uf vnsir vnd vnsirs clostirs schaden vnd czerunge mit dem obirsten rechte, beyde uf dem selben forwerke in dem Dornpussche vnd uf den gertenern doselbist, als wir daz vnd vnsir clostir mit czinsin, diensten vnd hirscheften frey an alle beswerunge bey sinen vorfarn vnd y vnd y von aldirs gehabit han vnd besessin. Des czu orkunde ist dirre brief mit vnsirn beyden der eptey vnd der samlunge anhanginden ingesegiln vorsegilt, der do gegeben ist czu Lubens, noch gotis geburt vierczenhundirt jar vnd in dem newnden jare an sante Johannis tage des ewangelisten, dorbey gewest seyn der woltochtige Petir Deysla vnd dy vorsichtigen Jost Libenaw, Cristof Viaw, Ruland Hezeler, Hannos Grewlich stadknecht czu Legnicz vnd Petir vnsir diner vnd andir mee.

O. d. St. L. No. 228. An Pergamentstreifen beide Siegel, wohlerhalten, das des Abtes in grünem, das des Klosters in rothem Wachs.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866